നെടുമങ്ങാട് താലൂക്കിലെ ശാസ്ത്രസാഹിത്യ പരിഷത് പ്രവര്‍ത്തനങ്ങള്‍ പ്രത്യക്ഷ തെളിവുകളൊന്നും പ്രകടമാക്കാതെ ആയിരത്തിതൊള്ളായിരത്തി എഴുപതുകള്‍ മുതല്‍ നാടിനു പുതിയൊരു സാംസ്‌കാരികതയ്ക്ക് രൂപം കൊടുക്കുന്നതില്‍ മുഖ്യമായ പങ്ക് വഹിച്ചു വരുന്നു. അധ്യാപകരും സാധാരണക്കാരുമുള്‍പ്പെടെ പുരോഗമന ചിന്താധാരയിലുള്ളവര്‍ അതിനെ നെഞ്ചേറ്റി. പുതിയ തലമുറ ആ പ്രകാശമേറ്റെടുത്തു. ഒച്ചയും ബഹളവുമില്ലാതെ അത് അനസ്യൂതമിന്നും തുടരുന്നു.
1975 ല്‍ നെടുമങ്ങാട്ട് എ. അജ്മലിന്റെ നേതൃത്വത്തില്‍ പരിഷത് പ്രവര്‍ത്തനങ്ങള്‍ തുടക്കമിട്ടത് ശാസ്ത്രക്ലാസ്സുകള്‍ നടത്തിക്കൊണ്ടായിരുന്നു. സമീക്ഷ ഫിലിം സൊസൈറ്റിയുടെ സഹായത്തോടെയാണ് പരിപാടികള്‍ നടന്നത്. ഗ്രാമശാസ്ത്ര സമിതികളാണ് തുടക്കത്തിലുണ്ടായിരുന്നത്. ക്രമേണ അവ യൂണിറ്റുകളായി മാറി. നെടുമങ്ങാട്ട് പരിഷത്ത് നടത്തിയ സിനിമാ പ്രദര്‍ശങ്ങള്‍ ശ്രദ്ധേയമായി. ഹോമിയോ മെഡിക്കല്‍ ക്യാമ്പുകളും ആളുകളെ ഈ കൂട്ടായ്മയിലേയ്ക്ക് ആകര്‍ഷിക്കുന്നതിന് സഹായിച്ചു.
1978 മുതല്‍ നടത്തിയ സ്‌കൂള്‍ ശാസ്ത്ര ക്ലബ്ബുകള്‍ അദ്ധ്യാപകരുടെ ശ്രദ്ധ പരിഷത്തിലെയ്ക്ക് കൊണ്ടുവന്നു. യുറീക്ക വിജ്ഞാനോത്സവം, ശാസ്ത്രകേരളം ക്വിസ് എന്നിവയും ജനകീയാരോഗ്യ ക്ലാസ്സുകളും പരിഷത്തിനെ ശ്രദ്ധേയമായ സാന്നിധ്യമാക്കി. സൈലന്റവാലിയും പരിസ്ഥിതി ക്ലാസ്സുകളും ജനങ്ങള്‍ കൗതുകത്തോടെ ഉള്‍ക്കൊണ്ടു.
ഗ്രാമശാസ്ത്ര സമിതികളുടെ നേതൃത്വത്തില്‍ നാടെമ്പാടും ശാസ്ത്ര ക്ലാസ്സുകള്‍ നടന്നു. ആ പുത്തനുണര്‍വ്വില്‍ പെരിങ്ങമ്മല, ആനപ്പാറ, വിതുര, ചെറ്റച്ചല്‍, ആനപ്പെട്ടി, കീഴ്പാലൂര്‍, തൊളിക്കോട്, ആര്യനാട്, പരുത്തിപ്പള്ളി, ഉഴമലയ്ക്കല്‍, കളത്തറ, അരുവിക്കര, കരകുളം, കുറുപുഴ, ആനാട്, ആട്ടുകാല്‍, ചുള്ളിമാന്നൂര്‍, പനയമുട്ടം, കൊഞ്ചിറ എിവിടങ്ങളില്‍ പുതിയ യൂണിറ്റുകള്‍ ആരംഭിച്ചു. ആയിരക്കണക്കിന് പ്രവര്‍ത്തകര്‍ അണിചേര്‍ന്നു.
1976 ല്‍ വെള്ളനാട് മിത്രാനികേതനില്‍ കൂടിയ യോഗമാണ് പരിഷത്ത് മേഖല രൂപീകരണത്തിലേയ്ക്ക് നീങ്ങിയത്. കെ.ടി. സുരേന്ദ്രനായിരുന്നു ആദ്യസെക്രട്ടറി. എം. ടി. വാമദേവന്‍ (ആര്യനാട്), വി രവീന്ദ്രന്‍ (വെള്ളനാട്), നെയ്യപ്പള്ളി അപ്പുക്കുട്ടന്‍, ശങ്കരന്‍കുട്ടി നായര്‍ (നന്ദിയോട്), ഡി. വാമദേവന്‍ (പാലോട്), ഇരിഞ്ചയം സെബാസ്റ്റ്യന്‍ എന്നിവര്‍ കമ്മറ്റിയില്‍ വന്നു.
പരിഷത്തിന്റെ സംസ്ഥാനതല വിദ്യാഭ്യാസപരിപാടികളുടെ തുടക്കം വെള്ളനാട്ടു നിന്നായിരുന്നു. 1981 ലെ അക്ഷരവേദിയാണ് പില്ക്കാലത്ത് കേരളത്തിലെ സ്‌കൂളുകളിലെ നിരക്ഷരത നിര്‍മ്മാജനമെന്ന ബ്രഹത് പദ്ധതിക്ക് വിത്തുപാകിയത്. ഇതിനു പിന്നില്‍ കെ.ടി. സുരേന്ദ്രന്‍ (വെള്ളനാട്), വി. രവീന്ദ്രന്‍, തുളസീദാസ് ( കിളിമാന്നൂര്‍)എന്നിവരാണ് ചുക്കാന്‍ പിടിച്ചത്. 1986 ല്‍ സമഗ്ര ശാസ്ത്രപഠനം എന്ന ലക്ഷ്യവുമായി ഉദ്ഗ്രഥന ശാസ്ത്ര പഠന പരിപാടി വെള്ളനാട്ട'് തുടങ്ങി. ശാസ്ത്രാദ്ധ്യാപകര്‍ക്ക് പുതിയ വെളിച്ചം നല്‍കിയ പരിപാടിയുടെ ഉപജ്ഞാതക്കളില്‍ കെ.ടി. സുരേന്ദ്രന്‍, വി. രവീന്ദ്രന്‍, എം.എന്‍. ശങ്കരനാരായണന്‍ എന്നിവരാണുണ്ടായിരുന്നത്. എണ്‍പത്തിയഞ്ച് എണ്‍പത്തിയെട്ടില്‍ ഗണിതം മധുരം എന്ന പരിപാടിയും പരിഷത്തിന്റെ നെടുമങ്ങാട് മേഖലയുടെ തനത് പരിപാടികളായിരുന്നു.
അക്ഷരവേദി പരിപാടികള്‍ പ്രായോഗിത തലത്തിലെത്തിക്കാന്‍ നിരവധി അദ്ധ്യാപകര്‍ക്കൊപ്പം ശിവപ്രസാദ് (മുതുവിള) ആനന്ദവല്ലി (മുതുവിള), പി. എ. ഉത്തമന്‍ എന്നിവരും അക്ഷീണം യത്‌നിച്ചു. അക്കാലത്ത് പരിഷത്തിന്റെ സംഘാടനത്തില്‍ നടന്നിരു അദ്ധ്യാപക പരിശീലന പരിപാടികളുടെ ഗുണഭോക്താക്കളാകാത്ത അദ്ധ്യാപകരുടെ സംഖ്യ കുറവായിരുന്നു.
നെടുമങ്ങാട് മേഖലയുടെ മറ്റൊരു തനത് പരിപാടിയായിരുന്നു ഓപ്പണ്‍ സ്‌കൂള്‍ പ്രവര്‍ത്തനങ്ങള്‍. വിജ്ഞാനോത്സവ കുട്ടികളുടെ തുടര്‍പഠനം ഇതുറപ്പാക്കിയിരുന്നു.
പരിഷത്തിനെ കുട്ടികള്‍ക്കിടയില്‍ എത്തിക്കുന്നതില്‍ ബാലവേദി നല്ലൊരു പങ്കുവഹിച്ചു. പി. എ. ഉത്തമന്‍, പി വേണുഗോപാല്‍ (നെടുമങ്ങാട്), പ്രഫുല്ലചന്ദ്രന്‍ (ആര്യനാട്), വെമ്പായം ജയചന്ദ്രന്‍, പ്രശാന്ത് (വെമ്പായം)എന്നിവരുടെ പങ്കാളിത്തം ശ്രദ്ധേയമായിരുന്നു. പി വേണുഗോപാലിന്റെ പാവകളി സ്മരണീയമാണ്.
സംസ്ഥാനത്തിനു തന്നെ മാതൃകയായതാണ് 1984 ല്‍ പൂവത്തൂരില്‍ നടന്ന കുട്ടികളുടെ സഹവാസ ക്യാമ്പ്. തൊണ്ണൂറുകള്‍ വരെ കുട്ടികളുടെ സഹവാസ ക്യാമ്പുകള്‍ മേഖലില്‍ നന്നായി നടന്നിരുന്നു.
പരിഷത് ജാഥകള്‍ സാധാരണക്കാരില്‍ വലിയ സ്വാധീനമാണ് ചെലുത്തിയിരുന്നത്. കുവേരി മുതല്‍ പൂവച്ചല്‍ വരെ നടന്ന ജാഥ ആദ്യകാല ശാസ്ത്ര സാംസ്‌കാരിക ജാഥ മുതല്‍ എല്ലാ ജാഥകള്‍ക്കും നെടുമങ്ങാട് മേഖലയില്‍ വമ്പിച്ച ജനപ്രീതിയാണ് ലഭിച്ചിരുന്നത്. അദ്ധ്വാനം സമ്പത്ത്, എവറഡി ബാക്ടറി ബഹിഷ്‌കരം, വനസംരക്ഷണം, വാമനപുരം പദ്ധതി, കിള്ളിയാര്‍ സുരക്ഷ ഇത്തരം ആശയങ്ങളുയര്‍ത്തി നെടുമങ്ങാട് മേഖലയുടെ തനത് ജാഥകളും വിവിധ കാലങ്ങളില്‍ നടന്നു. ആട്ടുകാല്‍ അജയന്‍, ആട്ടുകാല്‍ വിജയന്‍, ആട്ടുകാല്‍ ബൈജു, ഇരിഞ്ചയം മധു എന്നിങ്ങനെ കലാകാര പങ്കാളിത്തവും നെടുമങ്ങാട് മേഖലയുടെ വകയായി ഇതിനുണ്ടായി. നിരവധി പെണ്‍കുട്ടികളുടെ സാന്നിധ്യം എടുത്തു് പറയേണ്ടതാണ്.
സാക്ഷരതാ യജ്ഞത്തില്‍ കെ.ടി. സുരേന്ദ്രന്‍. രവീന്ദ്രന്‍ എന്നിവര്‍ സംസ്ഥാന കീ റിസോഴ്‌സ് പേഴ്‌സണ്‍സ് ആയിരുന്നു. സി. വിജയകുമാര്‍ (നെടുമങ്ങാട്) ജില്ല കോര്‍ഡിനേറ്ററും, പി കേശവന്‍ കുട്ടി (നെടുമങ്ങാട്) താലുക്ക് പ്രോജക്ട് ഓഫീസറുമായിരുന്നു. ത്രിവിക്രമന്‍ നായര്‍, സി കെ സദാശിവന്‍, കെ. പി. സന്തോഷ് കുമാര്‍, ബി. ബാലചന്ദ്രന്‍, ജി. എസ്. ജയചന്ദ്രന്‍, അരുവിക്കര രമേശന്‍, ബി. എല്‍. രാധാകൃഷ്ണന്‍, അശോകന്‍, ശേഖരപിള്ള എവര്‍ പരിഷത്തുകാരായ പ്രോജക്ട് ഓഫീസര്‍മാരായിരുന്നു. പി. എ. ഉത്തമന്‍ അക്ഷരകേരളം എഡിറ്ററായിരുന്നു. കളത്തറ മോഹന്‍, ആട്ടുകാല്‍ മോഹന്‍, ബി ചക്രപാണി, ടി മുരളീധരന്‍, ടി ശ്രീകുമാര്‍, എസ്. എല്‍. ശശികുമാര്‍ എന്നിവരുടെ അദ്ധ്വാനവും സ്മരണീയമാണ്. ആയിരക്കണക്കിന് യുവതീയുവാക്കളെ സാമൂഹ്യമുന്നേറ്റത്തില്‍ പങ്കാളികളാക്കാന്‍ പരിഷതിനു കഴിഞ്ഞു. ജെ. അരുന്ധതി എം എല്‍ എ ഉള്‍പ്പെടെ ഒരുപിടി ഭരണാധികാരിളുടെ തുടക്കവും നെടുമങ്ങാട് പരിഷത് കളരിയില്‍ നിന്നായിരുന്നു.
ജനകീയാസൂത്രണ പരിപാടികള്‍ പുതിയ ഉണര്‍വ്വ് നല്‍കി. കുടുംബശ്രീ അയല്‍ക്കൂട്ടം എന്നിവകളിലേയ്ക്ക് വളര്‍ന്ന നെടുമങ്ങാട്ടിലെ സംഘബോധത്തിന്റെയും ജനകീയ കൂട്ടായ്മയുടെയും അടിസ്ഥാനവും പരിഷത്ത് ഊര്‍ജ്ജത്തില്‍ നിന്നായിരുന്നു.
ജ്യോതിശാസ്ത്ര ക്ലാസ്സ്, ഉര്‍ജ്ജസംരക്ഷണ പ്രവര്‍ത്തനങ്ങള്‍, പരിഷത്ത് അടുപ്പ്, സോപ്പു നിര്‍മ്മാണം. സാഹിത്യത്തിലൂടെയുള്ള ആശയ പ്രചരണം. എന്നിവയിലും നെടുമങ്ങാട് മേഖല ജനകീയ സംഭാവനകള്‍ നല്‍കി. ചെലവു കുറഞ്ഞ വീടുകളുടെ നിര്‍മ്മാണം പരാജയപ്പെട്ട' പ്രവര്‍ത്തനങ്ങളില്‍ ഒന്നായിരുന്നു. സാഹിത്യ ക്ലാസ്സുകള്‍ ഒരു കൂട്ടം യുറിക്ക എഴുത്തുകാരായ കുട്ടികള്‍ക്ക് അവസരം നല്‍കി. യുറീക്ക വിജ്ഞാന പരീക്ഷകള്‍ കുട്ടികളെ പരിഷത്തുമായും ബന്ധിപ്പിക്കുന്ന കണ്ണിയായി തുടരുന്നു. എന്‍. പി. ഗിരി, ഡോ. ബി. എസ്. രാജശേഖന്‍ എന്നിവര്‍ ശാസ്ത്രഗതിയിലെ പ്രധാനപ്പെട്ട എഴുത്തുകാരായിരുന്നു. നയനതാര എന്‍ ജി, വിനീഷ് കളത്തറ, പി കെ സുധി എന്നിവരുടെ പുസ്തകങ്ങള്‍ പരിഷത്ത് പ്രസിദ്ധീകരിച്ചു. ജിജോ കൃഷ്ണന്‍ ശാസ്തക്ലാസ്സുകള്‍ നടത്തിവരുന്നു. യുവസമിതിയുടെ പരിപാടികള്‍ നെടുമങ്ങാട് മേഖലയില്‍ സജീവമാണ്. കളത്തറ യൂണിറ്റ് പരിപാടികള്‍ ജില്ലയിലെമ്പാടും ശ്രദ്ധനേടുകയുണ്ടായി.
ഭോപ്പാല്‍ ദുരന്തവും എവറഡി ബഹിഷ്‌കരണ പരിപാടികളും (1985) സ്മരണീയമാണ്. പതിനായിരം ശാസ്ത്ര ക്ലാസ്സുകള്‍ (1989), വഞ്ചിക്കപ്പെടു ഉപഭോക്താവ്, ഹാലി ധൂമകേതുവിന്റെ വരവോടെ നടത്തിയ നക്ഷത്ര നിരീക്ഷണം എന്നീ ക്ലാസ്സുകളും ശാസ്ത്രസാഹിത്യ പരിഷതിന് നെടുമങ്ങാട് മേഖലയില്‍ വമ്പിച്ച ജനശ്രദ്ധ നേടിക്കൊടുത്തു. ബഹുരാഷ്ട്ര കുത്തകളെ ഒഴിവാക്കി ബദല്‍ പരിപാടികള്‍ നന്നായി പ്രാവര്‍ത്തികമാക്കിയിരുന്നു. സമ്പൂര്‍ണ്ണ സാക്ഷതരാ യജ്ഞവും ജനകീയാസൂത്രണവും പരിഷത്തിന്റെ പുഷ്‌കലമായ കാലമായിരുന്നു.
മേഖലാഭാരവാഹികളായ ഹരിദാസ് (നന്ദിയോട്), ജയദേവന്‍ (കുറുപുഴ), ബി. ശശികുമാരന്‍ നായര്‍, സി. വിജയകുമാര്‍, ഇരിഞ്ചയം ബാബു, മനോഹരന്‍ നായര്‍, ഇ ശങ്കരന്‍ പോറ്റി, പി. വേണുഗോപാല്‍, ബി. എല്‍ രാധാകൃഷ്ണന്‍, ടി. മുരളീധരന്‍, മദന്‍മോഹന്‍ (വിതുര), ശങ്കരന്‍ പോറ്റി, ജി.ജെ. പോറ്റി, പ്രഫുല്ലചന്ദ്രന്‍ വി (ആര്യനാട്), എം ജി വാസുദേവന്‍ പിള്ള, ജെ. രാമചന്ദ്രന്‍, രഘുകുറ്റിയാനി, സെന്റ്‌ജോര്‍ജ്ജ്, ആട്ടുകാല്‍ ഗോപന്‍, വിലാസചന്ദ്രന്‍, കളത്തറ വിനീഷ്, കളത്തറ മോഹന്‍, അരുവിക്കര ബി ശ്രീകുമാര്‍, സി. സുന്ദരേശന്‍, വൈ. എ. റഷീദ്, ശരത്ചന്ദ്രന്‍, കരകുളം ഹരി, ശ്രീകണ്ഠന്‍ നായര്‍, ബിജൂ കളത്തറ, നാഗപ്പന്‍ എ. കെ. (വെമ്പായം), നാഗപ്പന്‍ ബി. കളത്തറ രജ്ഞിത്, ബിനു കളത്തറ എിവര്‍ സ്മരണീയമായ പ്രവര്‍ത്തനങ്ങളാണ് നടത്തിയിട്ടുള്ളത്.
കെ.ടി സുരേന്ദ്രന്‍ സംസ്ഥാന സെക്രട്ടറിയായി (1984), മേഖലയില്‍ നിന്നും രവീന്ദ്രന്‍ വി , കേശവന്‍കുട്ടി, നുജും (വെമ്പായം) എന്നിവരും ജില്ലാസെക്രട്ടറിമാരായി പ്രവര്‍ത്തിച്ചു.
എണ്ണിയാലൊടുങ്ങാത്ത ആത്മാര്‍ത്ഥയുള്ള പ്രവര്‍ത്തകരാണ് നെടുമങ്ങാട് പരിഷത്തിന്റെ കരുത്ത്. അവര്‍ യൂണിറ്റുതലം മുതല്‍ ഭാരവാഹികളായും പുസ്തക പ്രചരണം മുതല്‍ അടുപ്പു നിര്‍മ്മാണം വരെ ബൗദ്ധികവും അല്ലാത്തതുമായ പരിപാടികള്‍ വിജയിപ്പിക്കാന്‍ കരുത്ത് പകര്‍ന്നു എന്ന കാര്യം സ്മരണീയമാണ്.
0 comments:
ഒരു അഭിപ്രായം പോസ്റ്റ് ചെയ്യൂ